________________
सिरिभुयणसुंदरीकहा ॥
रोयंति सकज्जलअंसु-सलिलसामलियवयणकमलाओ । नाणापयारपलवियनिठुरजणजणियकरुणाओ ।।४५२१।। 'हा नाह ! हिययवल्लह ! हा हा हा पवणकेउखयरिंद ! । हा वीर ! गुरुपरक्कम ! हओ सि कह वीरसेणेण ? ॥४५२२।। हा हा ! हयाओ अम्हे निहयाओ अपुन्नघडियदेहाओ । निहओ त्ति सुए फुट्टइ न जाण सयसक्करं हिययं ॥४५२३।। कह एयं पि न नायं जो गयणे हणइ कमलकेउं पि ? । हा सो वि वीरसेणो जमो व्व किं रोसिओ तुमए ? ।।४५२४।। तह नाह ! जलहितीरे गुरुसेलसिहासहस्स निहओ जो । न मओ किमेत्तिएणं न बुज्झसे जं रिऊ विसमो ? ||४५२५।। कह सो आरोडिज्जइ रणंगणे गुरुपरक्कमो सत्तू । अणुकूलं चिय जायं जस्स महाजलहिपक्खिवणं ? ||४५२६।। वेयड्डोभयसेढीसु जेण रुद्रुण होइ जयपलओ । तं पि असोयं जेउं चंदसिरी जेण आणीया ॥४५२७॥ एक्कंगेण वि जेणं भडकोडिसहस्ससंगया तुब्भे । दप्पुद्धरे वि तणमिव परितुलिया सेहरसमेया ॥४५२८।। एक्कक्केण वि चरिएण जस्सच्चब्भुयप्पहावेण । सामन्नो वि हु बुज्झइ कह न तुम जो असामन्नो ? ||४५२९।। अहवा को तुह दोसो ? दोसो अम्हाण एस सव्वो वि । जं जुयइलक्खणेणं सुहासुहं होइ पुरिसस्स' ।।४५३०॥ इय एवमाइबहुविह-पलावसयजायघग्घरसराओ । कह कह वि परियणेणं मए वि संबोहियाओ त्ति ॥४५३१॥
Jain Education International
For Private & Personal Use Only
www.jainelibrary.org
