________________
૨૮૮
सिरिभुयणसुंदरीकहा ॥ सहि ! एसा चंदसिरी विज्जाहरिविंदवेढिया एइ । जेणं चिय अवहरिया तेणं चिय मणिविमाणेण ||४२४६।। हलिमाए ! पेच्छ चोज्जं एसो च्चिय सो असोयखयरिंदो । उज्जाणाओ तइया अवहरिया जेण चंदसिरी ॥४२४७।। पियसहि. ! चंदसिरि च्चिय सलहिज्जइ सयलजुवइमज्झंमि । जा वीरसेणघरणीसदं पाविह(हि)इ अइदुलहं ॥४२४८।। सहि ! सरिसरूव-जोव्वण-लावन्न-कला-कुलाणुरायाण । केसिंचि तुडिवसेणं संजोगो होइ धन्नाण' ।।४२४९।। इय वीरसेणदंसणरसपरवसभावकयवियाराण । एमाइणो अणेया संजाया जुयइआलाया ।।४२५०।। पत्तो कमेण पयपय-पेच्छणयच्छरियबहुविणोयसयं । घणवइयरं व नयरं पेच्छंतो राउलदुवारं ॥४२५१।। पविसइ पविसंतमहा-करिंदघणदाणवारिधाराहिं । पिहियरह-तुरयखरक्खु(खु)र-समुक्खयाणंतरयपडलं ॥४२५२ ।। समयविसमाणबलभर-दुवारपडिरुद्धनिग्गम-पवेसं । तोरणनिबद्धदप्पणघडत-विहडंतजणपडिमं ॥४२५३।। कत्थ वि वंसविमीसिय-गायंताणंतगायणसमूहं । कत्थ वि सिरिकरणट्ठियसामंतविलद्धबहुदेसं ॥४२५४॥ कत्थ वि य सत्तसालादिज्जंताणंतलोयधण-कणयं । कत्थ वि पढंतबहुविहबंदिसमुग्घुट्टजयसदं ॥४२५५।। कत्थ वि वारविलासिणि-रसणामणिकिंकणीरवकरालं । कत्थ वि ड(ढ)क्का-मद्दल-कलकाहलसद्दगंभीरं ॥४२५६।।
Jain Education International
For Private & Personal Use Only
www.jainelibrary.org
