________________
३६८
पहवइ न बुद्धिविहवो अग्घंति न नीइसत्थउवएसा । न परिक्कमो य पसरइ संपइ मह पत्थुए कज्जे ||४०२६ ॥ पन्नायरो त्ति नामं गुणनिप्फन्नं जमासि मह पुव्विं । तमणेण वइयरेणं अजहत्थं संपयं होही ||४०२७|| ता पुरिसकारसज्झं न होइ एयंति वासणा मज्झ । जइ देवयाणुहावा नरिंदकुसलं परं होइ ||४०२८ || ता सव्वहा सुरासुरकिरीडमणिमसिणचरणतामरसं । उवरोहेमि नरेसरकज्जे चक्केसरिं देविं ॥ ४०२९॥ सा चेय दुत्थियजणं संधीरइ तिहुयणस्स जणणिव्व । भव्वंभोरुहनिवहं पहायसंझ व्व बोहेइ ||४०३०|| ता सव्वपयारेणं देविं आराहिऊण रायस्स । कुसलं चिंतामि अहं एयं मह संपयं किच्चं' ||४०३१॥ इय हिययनिच्छयमिणं मंती काऊण विपणिमग्गाओ । नियपरियणं च वंचिय घणतिमिरनिरंतरनिसाए ||४०३२ || एकुंगो च्चिय पत्तो पुरबाहिं तंमि सुंदरुज्जाणे । निहुयपयं च पविट्ठो चक्केसरिभवणमज्झमि ||४०३३॥ जा जामि तस्स मज्झे ता निसुओ अफुडवन्नविन्नासो । कस्स वि गब्भहरंतरपरिसंट्ठियमाणुसालावो ||४०३४ || कोऊहलेण तोऽहं अलक्खदेहो तदेक्ककोणंमि । को जंपइ त्ति नाउं थंभंतरिओ ठिओ तत्थ ||४०३५ || जोएमि जाव निउणं ताव पईवप्पहावपडियंगो (पयडियंगो) । दिट्ठो मए महायस! विचित्तजसनरवई पुरओ ||४०३६॥
Jain Education International
सिरिभुयणसुंदरीकहा ॥
For Private & Personal Use Only
www.jainelibrary.org
