________________
३६६
सिरिभुयणसुंदरीकहा ॥ को कुणइ तस्स नामं मायाबहुलस्स पवणकेउस्स । सो वीरसेणसुहडो च्छलेण विणिवाइओ जेण?' ||४००४।। अन्नखयरेण भणियं अगेज्झनामो तिलोयमझंमि । न मए दिट्ठो निसुओ बंधववैरं अणुसरंतो ॥४००५।। सो पवणकेउणो किर कणिट्ठभाया इहेव णयरंमि । अत्थवइपियारत्तो निहओ नणु वीरसेणेण ॥४००६।। पुरिसे कयावराहे खमंति जइ ते परं खमासमणा । इयराण असामत्थं भयं च खंती पयासेइ ॥४००७।। सो चेव अदट्ठव्वो अगिज्झनामो य होइ सो चेव । अवयरमाणंमि न जो रिउंमि अवयरइ सत्तीए ॥४००८।। एएण कारणेणं निहओ सो पवणकेउणा सत्तू । च्छलबंधणं च वइरिसु कायव्वं न उण पणईसुं ।।४००९।। इय गयणंतरनिसिसंचरंतविज्जाहराण अन्नोन्नं ।
आलावं सोऊणं राया मं भणिमाढत्तो ॥४०१०।। 'हा ! किं निहओ कुमरो नियभाउयवेरमणुसरंतेण । पवणेण ? अन्नहा कह हवंति एवंविहालावा?' ।।४०११।। निहओ त्ति निसुयमेत्ते राया गुरुदुक्खभारओट्ठद्धो । मुच्छानिमीलियच्छो ‘धस'त्ति धरणीयले पडिओ ॥४०१२।। तो चंदणरससीयलसमीरसंगेण लद्धचेयन्नो । मणसंठियकज्जत्थो मोणेण ठिओ महाराओ ।।४०१३।। बोल्लाविओ[य] बहुयं अलंघवयणेहिं गुरुयणाईहिं । अवहीरणाए ताण वि एवं पि न उत्तरं देइ ।।४०१४॥
Jain Education International
For Private & Personal Use Only
www.jainelibrary.org
