________________
३६२
सिरिभुयणसुंदरीकहा ॥ संनिहियसूरमंडलवसपसरियवीरसेणसंतावं । घणमंडलप्पवेसो पसमइ सिसिरंबुसंगेण ।।३९६०।। मेहंबुकणकणारियचंदसिरीसरलनयणपम्हाइं । दठूण वीरसेणो सासंको खुहइ खणमेत्तं ॥३९६१।। घणरविकिरणकरालियविमाणरविकंतजलणजालासु । दीसंति धूममंडलभमेण खयरेहि घणनिवहा ॥३९६२।। सहइ बहुवन्नमणिमयविमाणपसरंतकिरणकब्बुरियं । कुमरागमे व्व नहसिरिरंगावलिसोहियं गयणं ॥३९६३।। गयणं ति अइजवेणं निम्मलफलिहुज्जले विमाणंमि । अब्भिट्टो पहसिज्जइ को वि नरो खयरनारीहिं ।।३९६४ ।। संकिन्नपहत्तेणं अग्गेसरपिहुविमाणभित्तीए । ज्झंपियविमाणदारे परिरंभइ को वि नियदइयं ।।३९६५।। 'किं पुरओ न निरिक्खसि ? निययविमाणेण पेल्लसे जमिह । मज्झ विमाणं वच्चसु थिरचित्तो पिययमापासे' ॥३९६६।। नियडविमाणगवक्खयनिविट्ठविज्जाहरीओ अन्नोन्नं ।।
अंगयकोडिविलग्गं दुहेण मोयंति हारलयं ।।३९६७।। 'तुह वीरसेणआणा जइ पेल्लसि अंतरे नियविमाणं । अइसकडंमि मग्गे जाइज्जइ खेयर ! थिरेहिं ॥३९६८।। रे विज्जाहर ! पुरओ कलयलसदं निवारसु खणद्धं । निसुणसु गाइज्जतं परक्कमं वीरसेणस्स ॥३९६९।। कोलाहले पसंते एसो कह समइ वीरसेणस्स । विज्जाहरिचलचामरकरकंकणझणझणासहो ? ॥३९७०।।
Jain Education International
For Private & Personal Use Only
www.jainelibrary.org
