________________
३१७
सिरिभुयणसुंदरीकहा ॥ हंतूण कमलकेउं सीलं जीयं च रक्खियं जीए । सा चेव पउमएवी जसढक्का जस्स भुयणमि ॥३४६८॥ ता अत्थि मह विसेसाणुढाणं अज्ज अट्ठमिनिसाए । तं कायव्वमविग्धं अज्जेव य मंतसंसिद्धी ॥३४६९।। ता साहेज्जमवस्सं तुमए मह सव्वहा वि कायव्वं । मह पुन्नेहिं अरन्ने घडिओ सि तुमं न संदेहो ॥३४७०।। तयणंतरं च पुण तुह सकलत्तं संघडेमि वरमित्तं' । इय जोइएण भणिए भणियं पुणो देव ! एएण ॥३४७१।। 'भयवं ! महापसाओ संपज्जउ तुज्झ कज्जसंसिद्धी । मह उण सुमित्तजोगो तुहाणुभावेण संभविही' ॥३४७२।। तो जोइएण भणियं 'वच्चामो वच्छ ! कज्जसिद्धीए । जाव न रयणी वच्चइ दुजाममेत्ता महासत्त !' ||३४७३।। कयचंडीचलणच्चण-वावारा दो वि गहियउवगरणा । संपत्ता अइभीसणमसाणभूमि(मि) असंभंता ।।३४७४।। तत्थागंतूण तओ मंडलपूयाविहिं च काऊण । उवविठ्ठो तस्सुवरि सो जोई भणिउमाढत्तो ।।३४७५।। 'भो ! बंधुयत्त ! एयं जोइणिखेत्तं सपच्चवायं च । वेयाल-भूय-रक्खस-पिसायसयसंकुलं घोरं ॥३४७६॥ ता सावहाणहियओ चउसुं पि दिसासु खित्तचक्खू य । जह कस्स वि अवयासो न होइ तह तं करेज्जासु' ||३४७७।। एएण तओ भणियं 'भयवं ! मा किं पि कुणसु आसंकं । जाव अहमेत्थ ता तुह को किर वंकं पलोएंइ ? ॥३४७८।।
Jain Education International
For Private & Personal Use Only
www.jainelibrary.org
