________________
२९८
सिरिभुयणसुंदरीकहा ॥ तो भणइ खेयरिंदो 'गिण्हसु खग्गं न होसि रे दुट्ठ !। पेच्छसु पाव ! अयंडे जमनयरं मज्झ हत्थेण' ॥३२५९।। अह तेण वीरसेणो सावटुंभेण खयरवयणेण । आणंदिओ व्व समुहो संपत्तो पाणिकयखग्गो ॥३२६०।। अन्नोन्नं पुलइज्जइ पुलओ सुहडेहिं दोहिं वि सदेहे । मणवंच्छियजयलच्छीपरिरंभवसेण व पयट्टो ॥३२६१।। तो भणइ वीरसेणो 'पहरसु खग्गेण खयर! अखु(क्खु)द्धो । इय भणिएणं मुक्को निद्दयपहरो असोएण ॥३२६२।। तेण वि दक्खत्तेणं अणोसरंतेण वंचिऊण सयं । खित्तो खग्गपहारो सो वि असोएण तह दिट्ठो ॥३२६३।। इय अन्नोन्नं ताणं दक्खत्तणवंचियासिघायाण । पयडियविन्नाणगुणं जायं जुझं महाघोरं ॥३२६४।। अब्भिर्टेति खणेणं, खणेण विहडंति, संघडंति खणं । खणमुटुंति सुदूरं, कयनिग्घाया पडंति खणं ।।३२६५।। खणमुवहसंति घायं खणं च निहसंति निठुरं निहया । उब्भडभिउडीभंगा खणमन्नोन्नं व हक्कंति ।।३२६६।। खणमप्पंति सरीरं पहरस्स परोप्परं खणं निहया । मुच्छानिमीलियच्छा पडंति वसुहाए निच्चेट्ठा ॥३२६७।। खणमुट्ठिऊण एक्को आसासइ सीयलोवयारेण ।। खणमागयचेयन्नो जुझंति पुणो तह च्चेय ।।३२६८।। इय ताण परोप्परमच्छेरण समरे अभग्गपसराण । जुज्झंताणं भग्गो असिधारंगो असोयस्स ॥३२६९।।
Jain Education International
For Private & Personal Use Only
www.jainelibrary.org
