________________
सिरिभुयणसुंदरीकहा ॥
२८१ - चिंतत्तो(न्तो) च्चिय एवं पयंडपवणुच्छलंतगुंजाहिं । उक्खित्तो खग्गकरो कुमरो खयरो व्व गयणंमि ।।३०७२।। 'एए दीसंति तरू एण्हि वणराइमेत्तमच्छरियं । तीरं च्चिय सव्वत्तो अपाररयणायरो नवरं ॥३०७३।। ता अवहरिओ संपइ तेणेव दुरासएण रिउणाऽहं । नूणं महासमुद्दे खिविही' इय चिंतइ कुमारो ।।३०७४।। 'को नाम तस्स दोसो निययच्चिय कम्मपरिणई एसा । अविवेय(यि)णो हि पुरिसा, परस्स रूसंति मूढप्पा ।।३०७५।। अन्नो न एत्थ सत्तू न य मित्तो होइ किंतु अप्पेव । तब्भावभाविओ खलु अप्पंमि रिऊ य मित्तो य ॥३०७६।। तेलोक्कमेव सत्तुत्तणेण परिणवइ दुट्ठहिययस्स । तं चेव सुद्धहिययस्स होइ नियबंधवसरिच्छं ।।३०७७।। एयंमि मएऽवस्सं अवयरियं तेण अम्ह एसो वि । अवयरइ जेण सत्तू न होइ निक्कारणो कोइ ॥३०७८।। ता सहियव्वं संपइ सव्वं अविसाइणा जहोवणयं । नाऊणं च गुरूहिं(हि)वि 'अविसाई होज्ज' इय भणिओ ॥३०७९॥ अलमन्नचिंतिएणं चिंतामि तमेव जं असामन्नं ।। भवजलहिपोयभूयं तिलोयबंधुं नमोकारं' ।।३०८०।। इय एवं चिंतंतो अदीणहियओ समुक्खओ दूरं । अविभावियवसुहा-जलहिवित्थारो खयरविज्जाए ॥३०८१।। पेच्छइ अप्परिफुडजीवलोयधूमधयारियं गयणं । पणत्ती(ती)सजोयणुच्चं अक्खुहियमणो महासत्तो ॥३०८२।।
Jain Education International
For Private & Personal Use Only
www.jainelibrary.org
