________________
২৩৩
सिरिभुयणसुंदरीकहा ॥
खयकालसंभवो न हि दूसमदुसमाए जेण सो कहिओ । नियकम्मपरिणई उण संसारत्थाण संभवइ ॥३०२८।। इह पुव्वभवसमज्जियअइनिविडदुकम्मजालवडियाण । न हि कम्मविवररहिओ मोक्खो मीणाण व जियाण ॥३०२९।। इहलोए दुक(क)म्मं तमेव मह जं हओ कमलकेऊ । नरसीहस्स उ एवं सामत्थो कह णु संभविही (?) ||३०३०।। 'मं रक्खसुत्ति भयविहलपरवहूसीलपाणरक्खट्टा । तत्थासि निमित्तमहं सो उण निहओ दुकम्मेण ।।३०३१।। केत्तियमेत्तं च इमं परनारिपसंगओ बहुं होइ । नरयंमि जलंतायसनारीआलिंगणाइ दुहं ।।३०३२।। ता इहलोए पावं तमेव मह केवलं न उण अन्नं । परलोइयपावाइं सव्वन्नू जइ परं मुणइ ॥३०३३।। ता एवमहं जाणे बंधू तस्सेव कमलकेउस्स । को वि भविस्सइ नूणं तव्वेरमणुसरंतो मे ॥३०३४।। कुणइ विणिवायणत्थं गुरुगिरि-तरुनियरपाडणं अहवा । अवियाणियपरमत्थो नाहमिणं चिंतइस्सामि ॥३०३५।। अविणिच्छियं न कज्जं चित्ते वि धरंति उत्तमा पुरिसा । निच्छइए वि हु कज्जे पसरंति न ताण वाणीओ' ॥३०३६।। इय जाव वीरसेणो चिंतइ ता गिरिवरं महाकायं । नीसेसपिहियमहियलमेक्कं आलोवए उवरिं ॥३०३७॥ सिहरंतज्झरंतोज्झरनिविडयरपडंतवारिधाराहिं । उच्छाइयगयणयलं खयकालघणं व्व अइघोरं ॥३०३८।।
Jain Education International
For Private & Personal Use Only
www.jainelibrary.org
