________________
२७४
सिरिभुयणसुंदरीकहा ॥ ता तं कह पेच्छिस्सं विसालवसुहायले परिभमंतं ? । इय चिंतावसवत्ती अहियं सो दुक्खिओ जाओ ।।२९९५।। मुणिऊण तक्खणं च्चिय विज्जासामत्थओ पवणकेऊ । पत्तो समुद्दतीरं कोवारुणलोयणो रोद्दो ।।२९९६।। तो तेण तत्थ दिट्ठो दुद्धरिसो पवणकेउणा कुमरो । असरिसपहावहुयवहसहस्सजालाहिं व जलंतो ।।२९९७।। एगो वि अणेगेहिं व सुहडसहस्सेहिं परिगओ सहइ । दुद्धरिसतेयभासुरसरीरबंधो महावीरो ॥२९९८।। पेच्छइ विम्हयवियसंतनयणभालाहिरूढभूजुयलो । सो कुमरं रणसंकाघडियायसपट्टबंधो व्व ।।२९९९।। दठूण गिम्हदूसहमज्झण्हजलंततेयभाणु व्व । सो खेयरो सखेयं तं दटुं इय विचिंतेइ ।।३०००।। 'लहइ च्चिय माहप्पं लहुओ वि रिऊ गुरूहिं सह भिडिओ । असरिससत्तिनिहाणं वज्जो व्व महामहिहरेहिं ॥३००१॥ निज्जीवो वि हु पज्जलइ तेयंसिपयावसंकमवसेण । तरणिकिरणाणुसंगी सुनिच्छियं सूरकंतो व्य ।।३००२।। भुयणाहियवीरियकमलकेउविणिवायलद्धमाहप्पो । अज्ज वि तक्कोवानलसंगजलंतो व्व पडिहाइ ।।३००३।। पोढंगणापसंगे सत्तुविणासे य भिन्नसंधाणे । विसमट्ठिए य कज्जे हवंति गरुया थिरारंभा ।।३००४॥ ता संपइ सत्तुवहो कायव्वो सो य अप्परक्खाए । कीरंतो विबुहाणं पसंसणीओ जओ होइ ।।३००५।।
Jain Education International
For Private & Personal Use Only
www.jainelibrary.org
