________________
सिरिभुयणसुंदरीकहा ॥
कन्ने ठइऊण तओ मंतियणो भणइ देव ! न हु एयं । . अप्पपरिरक्खणेणं जं होइ तयं पसाहेह ।२६७६॥ देसेण परियणेण य पुरेण लोएण अत्थनिवहेण । अप्पेव रक्खियव्वो नरवइणा सव्वजत्तेण ।।२६७७।। परिरक्खियनियदेहो कालं लहिऊण लहइ सव्वंपि । इय देव ! अम्ह मंतो अओ परं मुणसि तुममेव' ।।२६७८॥ पुण ताएणं भणियं 'किं न सुयं पुव्वमेव मह वयणं । 'परपाणपयाणेणं नाऽहं रक्खामि अप्पाणं' ? ॥२६७९॥ किं बहुणा भणिएणं ? सधिया मह दोहयाए जइ कुणह(?) । परउवयारत्थं मे पयट्टमाणस्स उवघायं' ॥२६८०।। एत्थंतरंमि भणिओ ताएणं रक्खसो इमं वयणं । 'नीसेसलोयठाणे रक्खस ! मं चेव भक्खेसु' ॥२६८१।। तो रक्खसेण भणियं ‘एको वि न सो नरिंद ! तुह अत्थि । पुरिसो जं पइदियहं मह देसि जमप्पणा ढुक्को ?' ||२६८२॥ तो भणइ पुणो ताओ ‘असेसपुरिसाहिवो अहं एत्थ । अप्पंमि मए दिन्ने सव्वंपि हु जाण तुह दिन्नं' ||२६८३॥ ‘एवं होउत्ति तओ भणियं रक्खेण 'होसु सुइभूओ । उच्चल्लिऊण जेणं भक्खेमि बुभुक्खिओ अहयं' ।।२६८४।। तो अहिसित्तो पुट्विं अहयं नियनयणबाहसलिलेहिं । रज्जाहिसेयसमए पच्छा ताएण कलसेहिं ।।२६८५।। तो ताएणं भणिओ मंतियणो परियणो पुरजणो य । 'नियजोग्गयाणुरूवं ववहरियव्वं च तुम्हेहिं' ।।२६८६।।
Jain Education International
For Private & Personal Use Only
www.jainelibrary.org
