________________
सिरिभुयणसुंदरीकहा ॥
२४३ कीलाविणोयहेउं घायइ सो विविहपाणिसंघायं । बहुमज्ज-मस-रुहिरा कीला वि मणोहरा तस्स ॥२६५४।। अह अन्नया ठिओ सो गयणयले भणइ क(क)कससरेण । ‘रे समरसीह ! निसुणसु सोऽहं जो आसि तुज्झ गुरू ॥२६५५।। महसूयणोत्ति नाम(मो) संजाओ बम्हरक्खसो एण्हि । मह नरबलिं पयच्छसु निच्चं चिय पुरपरिब्भमणं' ।।२६५६।। तव्वयणं सोऊणं जाओ पुर-जणवओ य भयभीओ । किंकायव्यविमूढो चिंताजलहिंमि व निमग्गो ॥२६५७।। हा ! हा ! सो बहुजन्नी पालियकिरिओ अहीयचउवेओ । भगवजई वाणारसि-गंगाए मओ समाहीए ।।२६५८।। कयउद्धदेहकिरिओ अनिरुद्धणं न किं गओ सग्गं । गयणंमि बंभरक्खसभावं जं पयडए एस ? ॥२६५९।। जइ नाम रक्खसो च्चिय संजाओ पुव्वकम्मदोसेण । ता कह अवयाररओ संजाओ निययसीसाण ? ॥२६६०।। सा भत्ती सो पणओ सो बहुमाणो य तं महादाणं । अम्हेहि जं कयं किर वीसरियं तं पि एयस्स ? ॥२६६१॥ इय जा चिंतइ राया ता सो पुण भणइ कढिणवयणेहिं । 'रे! रे! किं न पयच्छह पडिवयणं मह भणंतस्स?' ॥२६६२।। तो ताएणं आलोच्चिऊण पुण रक्खसो इमं भणिओ । 'पुव्वावत्थाओ तुमं अहिययरं संपयं पुज्जो ।।२६६३।। भणसु किं तुज्झ कीरउ ?' इय भणिए रक्खसो पुणो भणइ । 'निच्चं नरबलिदाणं निसि नयरविहारमवि देह' ॥२६६४॥
Jain Education International
For Private & Personal Use Only
www.jainelibrary.org
