________________
२४०
सिरिभुयणसुंदरीकहा ॥ दिट्ठो सो भयवेविरजणेहिं परिवेढिओ नरिंदेण । पवणपहल्लिरवणराई(इ)परिग(ग्ग)ओ सेलराओ व्व ॥२६२१॥ दछृणं नरनाहो उदारसत्तं अखुद्धहिययं च । संधीरंतं पेसलकरुणवयणेहिं पुरलोयं ।।२६२२।। उत्तरइ तरलतुरयाओ तुरयपयक्खेवमुणियबहुमाणो । संभासइ रायसुयं सिणेहसारेहिं वयणेहिं ।।२६२३।। 'कुसलं तुह वीर ! कुओ भवं ?' ति पुट्ठो भणेइ ‘अज्जेव । तुह दंसणेण कुसलं नासिकपुराओ(उ) पहिओ म्हि' ।।२६२४।। पुणो(ण) भणइ वीरसेणो ‘इहेव नग्गोहरुक्खमूलंमि । उवविसिय कहह मज्झं नरिंद ! भयवइयरमसेसं' ॥२६२५।। 'एवं'ति पभणिऊणं राय-कुमारा य पौरलोओ य । उवविसइ तओ राया कहेइ कुमरस्स भयहेउं ॥२६२६।। 'वीराहिराय ! निसुणसु जं वित्तमिहासि पुव्वकालंमि । अच्चब्भुयवुत्तंतं वन्निज्जंतं समासेण ॥२६२७।। एत्थेव वीर ! नयरे आसि पुरा पयडविक्कमपयावो । नामेण समरसीहो राया विद्दवियपडिवक्खो ॥२६२८।। तस्स सुवंसुप्पन्ना वच्छत्थलकंठघोलिरा अत्थि । नामेण विजयसेणा पियभज्जा हारलट्ठि व्व ॥२६२९।। ताणमहं धन्नाणं पुत्तो नामेण विस्ससेणो त्ति । नियवंसविणासयरो फलं व वंसस्स संपत्तो ॥२६३०।। पत्तो कुमारभावं कलाकलावं च गाहिओ तेहिं । एवं तत्थ ठियाणं वच्चंति दिणा सुहं अम्ह ॥२६३१॥
Jain Education International
For Private & Personal Use Only
• www.jainelibrary.org
