________________
सिरिभुयणसुंदरीकहा ॥ हिंडंति जत्थ बाहिं समंतओ भीसणट्टहासेण । रक्खस-पिसाय-वेयाल-साइणी-भूयसंघाया ।।११८॥ एवंविहंमि घोरे संपत्ते अड्डरत्तसमयम्मि । सेज्जाए सुहनिसन्नो कुमरो दरमउलियच्छिजुओ ।।११९।। आइन्नइ वीणा-वेणुमीसी(सि)यं पवणवसपयद्वंतं । सवणिंदियरमणीयं अइमहुरं गीयझंकारं ॥१२०।। सविसेसवंसकलरव-गीयंतर-मणहरंतरारम्मं । आयड्डइव्व हिययं सुरगेयगुणेहिं कुमरस्स ।।१२१।। तो अउरुव्वसुगीया-यन्नणअक्खित्तमाणसो कुमरो । चिंतइ विसेसवड्ढंत-कोउहल्लो नियमणम्मि ॥१२२।। अहह ! महच्छरियमिणं सवणिंदियहारि असुयपुव्वं च । गेयं न मच्चलोए पायं एवंविहं अत्थि ।।१२३।। एत्थ बहूण वि गायण-गायणिलोयाण सुव्वए सद्दो । सो वीणाइ-उवस्सुइ-भिन्नो वि हु होइ एगोव्व ॥१२४।। अच्छउ ता इयरजणो मएवि नेयारिसं सुयं गेयं । नरलोयसुप(प्प)सिद्धा जस्स घरे गायणा संति ।।१२५।। ता निच्छियं न एयं मणुयाणं संभवेज्ज वरगीयं । अउरुव्वं च अवस्सं दट्ठव्वं होइ बुद्धिमया ।।१२६।। अउरुव्वदसणेणं अस्सुयपुव्वस्स हंत सवणेण । पावंतु कयत्थत्तं अज्जं मह नयण-सवणाइं ॥१२७।। जं अज्ज मंतिणा सिक्खिओम्हि न हरंति जह विधेयवणं । इंदियचोरा तं पि हु इमेण गेएण अंतरियं ॥१२८।।
Jain Education International
For Private & Personal Use Only
www.jainelibrary.org
