________________
सिरिभुयणसुंदरीकहा ॥
आपुच्छिओ य पिउणा सरीरसुहकुसलमवणउ(ओ)कुमरो । 'तुम्ह पसाएण सया कुसलं'ति पयंपइ विणीओ ।।८५।। तक्कालोच्चि(चि)यनाणा-विणोयखण-रज्जकज्जकयचित्ता । अच्छंति ते जहासुह-मत्थाणत्था जयसमत्था ।।८६।। तत्थत्थि महामंती नरवइपुज्जो महोयही नाम । अइगरुयजराभरजज्जरंगपरिनीसहावयवो ॥८७।। अइपंडुररोमसमूहकलियवच्छत्थलो य जो सहइ । हिययट्ठियनिम्मलगुरु-विवेयससिकिरणकलिओव्व ।।८८।। जरपंडुरभमुहापम्हमंडियं सहइ तस्स नयणजुयं । . सुहुमत्थदंसिमंतिसु आवज्जियजयवडायं व्व ॥८९॥ नरवइकज्जेसु सया अणुबंधो तस्स न निययदेहेऽवि । इय सिढिलिओव्व कोवा सणियं सिढिलेहिं अंगेहिं ।।९०।। सो दद्रूण कुमारं सव्वंगावयवसोहियं भणइ । स(सु)विणीयं पि हु सविसेस-विणयपडिगाहणत्थं व ।।९१॥ हरिविकुम ! वच्छ ! भणामि किंपि मा अन्नहा वियप्पेसुं । तुह पिउणो वि हु सिक्खाकज्जे मह चेव अहिगारो ॥९२॥ जइ वि हु पुव्वज्जियपुन्नरासिसंपाइया गुणे(णा) तुज्झ । तह वि अइनेहनिब्भर-हियओ सिक्खेमि किंपि तुमं ॥९३।। गुणबहुमाणं परिवज्जिऊण जो रूवगव्वमुव्वहइ । अविवेइत्तणभीयव्व तस्स दूरे गुणा होति ।।९४।। खलइ गई चलइ मणं जयमवि अजहत्थमेव परिणमइ । जोव्वणतिमिरुच्छाइयनयणस्स व एत्थ पुरिसस्स ॥९५।।
Jain Education International
For Private & Personal Use Only
www.jainelibrary.org
