________________
सिरिभुयणसुंदरीकहा ॥
हे सूरसेण ! मा पहर अम्ह गुणजायपक्खवायाण । असमंजससमराओ अवहरिओ राय ! अम्हेहिं ।।१६८६।। तो पच्चागयचेयन्नजायसत्थो पलोयए सूरो । अप्पाणं गयणयले देवा-सुर-खयरपरियरियं ।।१६८७।। सूरेण सुरा भणिया अवहरिओ किंनिमित्तमहमेत्थ ? । जीवंतो कह पेच्छामि नियसुयं वैरिहम्मंतं ? ॥१६८८।। मज्झ मयस्स उ जं होइ किंपि तं होउ नत्थि मणखेओ । ता अज्जवि में मुंचह निहणिस्सं वैरिसंघटुं ।।१६८९।। देवाइएहिं भणियं सच्चमिणं भणइ सूरनरनाहो । नियपुत्तरक्खणटुं एयस्स इमो रणारंभो ।।१६९०।। एयाण वि रायाणं पुत्तवहत्थं च एस पारंभो । ता सव्वहा वि रक्खह सूरसुयं सूरभज्जं च ।।१६७१।। एत्थंतरम्मि सहसा सिंगारवई सवीरसेणा य । विज्जाहरेहिं नीया सूरनरिंदस्स पासम्मि ॥१६९२।। तो सूरसेणसूडियइयरदिसारायजायनिकं(क्कं)टें । नरसीहं चिय मन्नंति साभिभावेण सेन्नाई ।।१६९३।। तो सूरसेणसेन्नं निहयं नाऊण संगरे सूरं । पुत्तं पि अपेच्छंत अनायगं दीणमणसं च ॥१६९४।। किंकायव्वविमूढं चंपं विसिऊण परबलअसझं । तह कयवेढं अच्छइ नरसीहनरिंदसेन्नेण ।।१६९५।। कालक्कमेण अंतो खीणे धण-धन्न-जवससंभारे । संबोहिऊण पविसइ पहाणलोयं पि नरसीहो ।।१६९६।।
Jain Education International
For Private & Personal Use Only
www.jainelibrary.org
