Page Text
________________
महानिसीह-सुय-खंधं
(१) 'से भयवं ! जइ एवं ता किं पंच-मंगलस्स णं उवहाणं कायव्वं ? (२) 'गोयमा ! ‘पढमं नाणं तओ दया. दयाए य सव्व-जग-जीव'-पाण-भूय-सत्ताणं अत्तसम-दरिसित्तं (३) सव्व-जग-जीव-पाण-भूयसत्ताणं-अत्तसम-दंसणाओ य तेसिं चेव संघट्टण-परियावण-किलावणोद्दावणाइ-दुक्ख-पायण-भय-विवज्जणं, (४) तओ अणासवो, अणासवाओ य संवुडासवदारत्तं, संवुडासव-दारत्तेणं च दमो पसमो (५) तओ य सम-सत्तु-मित्त-पक्खया, सम-सत्तु-मित्त-पक्खयाए य अराग-दोसत्तं, तओ य अकोहया अमाणया अमायया अलोभया, अकोह-माण-माया-लोभयाए य अकसायत्तं (६) तओ य सम्मत्तं, समत्ताओ य जीवाइ-पयत्थपरित्राणं, तओ य सव्वत्थ-अपडिबद्धत्तं, सव्वत्थापडिबद्धत्तेण य अन्नाण-मोह-मिच्छत्तक्खयं (७) तओ विवेगो, विवागाओ य हेय-उवाएय-वत्थु-वियालेणे-गंत-बद्ध-लक्खत्तं, तओ य अहिय-परिच्चाओ हियायरणे य अच्चंतमन्भज्जमो; (८) तओ य परम पवित्तत्तम-खंतादिदसविह-अहिंसा-लक्खण-धम्माणट्ठाणेक्क- करणकारवणासत्त-चित्तया', (९) तओ य खंतादिदसविहअहिंसा लक्खण-धम्माणुट्ठाणिक्क-करण-कारावणासत्तचित्तयाए य। सव्वुत्तमा खंती, सव्वुत्तमं मिउत्तं, सव्वुत्तमं अज्जव-भावत्तं, सव्वुत्तमं सबज्झन्भंतरं, सव्व-संगपरिच्चागं, सव्वुत्तमं सबज्झन्भंतर-दुवालसविह-अच्चंत-घोर-वीरुग्ग-कट्ठ-तव-चरणाणुट्ठाणाभिरमणं, सव्वुत्तमं सत्तरसविह-कसिणसंजमाणुट्ठाणपरिपालणेक्क-बद्ध-लक्खत्तं सव्वुत्तमं सच्चगिरणं छकाय-हियं अणिगूहियबल-वीरिय-पुरिसक्कार-परक्कमपरितोलणं च । सव्वुत्तम-सज्झायझाण-सलिलेणं पावकम्म-मल-लेवपक्खालणं ति । सव्वुत्तमुत्तमं आकिंचणं सव्वुत्तममुत्तमं परम-पवित्तुत्तम-सव्व-भाव-भावंतरेहि णं सुविसुद्ध-सव्व दोस विप्पमुक्क-णवगुत्ती-सणाह-अट्ठारस-परिहारट्ठाण-परिवेढिय- सुद्धद्धर-घोर-बंभवय-धारणं ति। (१०) तओ एएसिं चेव सव्वुत्तम-खंती-मद्दव-अज्जव-मुत्ती-तव-संजम-सच्च-सोय-आकिंचण-सुदुद्धरबंभवय-धारण-समुट्ठाणेणं च सव्व-समारंभ- विवज्जणं । (११) तओ य-पुढवि दगागणि-वाऊँ -वणप्फई बि-ति-चउ-पंचिदियाणं तहेव, अजीव- कायसंरंभ-समारंभारंभाणं च मणो-वइ-काय-तिएणं तिविहं तिविहेणं सोइंदियादि-संवरण-आहारादि-सण्णा विप्पजढत्ताए वोसिरणं; (१२) तओ य अट्ठारस-सीलंग-सहस्स-धारित्तं, अमलिय-अट्ठारस-सीलंग- सहस्स-धारणेणं च अखलिय-अखंडिय-अमलिय अविराहिय-सुझुग्गुग्गयरविचित्ताभिग्गह-णिव्वाहणं; । (१३) तओ य सुर-मणुय-तिरिच्छोईरिय-घोर परिसहोवसग्गाहियासणं समकरणेणं, तओ य अहोरायाइ-पडिमासुं महा-पयत्तं; (१४) तओ निप्पडिकम्म-सरीरया, निप्पडिकम्म-सरीरत्ताएं य सक्कज्झाणे निप्पकंपत्तं. तओ य अणाइ-भव-परंपर-संचिय-असेस-कम्म?-रासि-खयं अणंत-नाण-दंसणधारित्तं च, चउगइ-भव-चारगाओ निप्फेडं सव्व-दक्ख-विमोक्खं मोक्ख-गमणं चः (१५) तत्थ अदिट्ठ-जम्मजरा-मरणाणिट्ठ-संपओगिट्ठ-वियोय-संतावुव्वेवग-अयसब्भक्खाणं महवाहि-वेयणा-रोग-सोग-दारिद्ददुक्ख-भय-वेमणस्सत्तं, (१६) तओ य एगंतियं अच्चंतियं सिव-मयलमक्खयं धुवं परम-सासयं निरंतरं सव्वुत्तमं सोक्खं ति, (१७) ता सव्वमेवेयं णाणाओ पवत्तेज्जा।
(१) ता गोयमा ! एगंतिय-अच्चंतिय-परम-सासय-धुव-निरंतर-सव्वुत्तम-सोक्ख-कंखुणा पढमयरमेव तावायरेणं सामइयमाइयं लोग-बिंदुसार-पज्जवसाणं दुवालसंगं सुयणाणं, (२) कालंबिलादि-जहुत्तविहिणोवहाणेणं हिंसादीयं च तिविहं तिविहेणं पडिकंतेण य, (३) सर-वंजण-मत्ता-बिंदुपय-क्खराणूणगं पय
आ.
१ गज्जी व रवं. । २ मत्थप आ. सु. । ३ कारव वं. सं. । ४ सच्चुग्गिरणं आ. सु. । ५ सव्वुत्तमं परमपवित्त सव्व भावं सु.। ६ एएणं चेव आ.1७ समणुट्ठा रवं. । ७ वाअ-वरवं. । ८ अमिलियऽ हा आ. । ९ रगत्ताए सं. । १० वुव्वेग आ. सु. ला.।
Jain Education International
For Private & Personal Use Only
www.jainelibrary.org
| SR No. | 001149 |
| Book Title | Agam 39 Chhed 06 Mahanishith Sutra |
| Original Sutra Author | N/A |
| Author | Punyavijay, Rupendrakumar Pagariya, Dalsukh Malvania, H C Bhayani |
| Publisher | Prakrit Granth Parishad |
| Publication Year | 1994 |
| Total Pages | 284 |
| Language | Prakrit |
| Classification | Book_Devnagari, Agam, Canon, Ethics, & agam_mahanishith |
| File Size | 19 MB |